‘कारागारलाई किताब’ अभियानका लागि संकलित पुस्तक।

सुर्खेत, २० चैत ।
कारागारलाई सुधारगृह बनाउने उद्देश्यसहित कर्णाली प्रदेशका १० वटै जिल्लामा रहेका कारागारमा पुस्तकालय स्थापना गर्न लागिएको छ । कर्णाली प्रदेश प्रहरी कार्यालयका प्रमुख (प्रहरी नायब महानिरीक्षक) महेशविक्रम शाहको नेतृत्वमा रहेको ‘कारागारलाई किताब’ अभियानले कैदीबन्दीहरुको सुधार र सामाजिक पुनस्र्थापनामा सघाउ पु¥याउने व्यवस्थित पुस्तकालय स्थापना गर्न लागिएको हो ।

कर्णाली प्रदेश प्रहरी कार्यालयले सुरू गरेको ‘कारागारलाई किताब’ अभियानअन्तर्गत २१ लाख बराबरको किताब संकलन भएका छन्। अभियानलाई सफल बनाउन गठित समिति र उपसमितिका माध्यमबाट ८ हजार ३८८ वटा विभिन्न विषयका पुस्तक संकलन भएको छ।

प्रदेश प्रहरी प्रमुखको संयोजकत्वमा गठित मूल समितिले ४ हजार २८२ पुस्तक संकलन गरेको छ भने जिल्लास्थित  गठित उपसमितिले ४ हजार १०६ वटा पुस्तक संकलन गरेको प्रदेश प्रहरी कार्यालयले जनाएको छ।

मूल समितिले संकलन गरेको पुस्तक ९ लाख ६८ हजार ६ सय ७५ रुपैयाँ बराबरका रहेका छन् भने उपसमितिले संकलन गरेका पुस्तक झण्डै १२ लाख रुपैयाँ बराबर रहेका छन्।

अभियानलाई सार्थक बनाउन थालिएको पुस्तक संकलन अभियानका लागि विभिन्न ख्यातिप्राप्त लेखक तथा फाउण्डेशनहरूबाट पुस्तकहरू प्राप्त भएको कर्णाली प्रदेश प्रहरी प्रमुख शाहले जानकारी दिए ।

प्रदेशस्थित विभिन्न कारागारमा रहेका कैदीहरूका लागि पुस्तकालय स्थापना गर्ने उद्देश्यसहित मंसिरबाट सुरू भएको ‘कारागारलाई किताब’ अभियानमा समिति र अन्य व्यक्तिहरूले भरपूर सहयोग गरेको डिआइजी शाहले बताए। अहिले विदेशमा रहेका व्यक्ति तथा संघ, संस्थाबाट भने कुनै पनि सहयोग नलिइएको उनले बताए। उनकाअनुसार अहिले प्रदेशका सबै कारागारहरूमा पुस्तकालय स्थापनाका लागि व्यवस्थापन गरिसकिएको छ।

सुर्खेत, सल्यान, रुकुम पश्चिम, जाजरकोट, दैलेख, जुम्ला, डोल्पा, कालीकोट जिल्लामा कारागारभित्रै पुस्तकालय स्थापना गर्नेगरी व्यवस्था मिलाइएको छ। हुम्ला र मुगुमा भर्खरै निर्माण भएका कारागार भवन हस्तान्तरण नभएकाले हुम्लाको जिल्ला प्रशासनको कार्यालयभित्र र मुगुको जिल्ला प्रहरी कार्यालयभित्र पुस्तकालय स्थापना गर्ने व्यवस्था मिलाइएको उनले जानकारी दिए।

यही चैत २३ गते प्रदेशका दश वटै जिल्लाहरूमा पुस्तकालयको उद्घाटन गर्ने कार्यक्रम रहेको छ। पुस्तकालयहरूको उद्घाटनका लागि विभिन्न जिल्लाहरूमा राष्ट्रिय तथा अन्तर्राष्ट्रियस्तरमा ख्याति प्राप्त लेखक तथा साहित्यकारहरूको पनि सहभागिता रहने कारागारलाई किताब अभियान मूल समितिका संयोजक डिआइजी शाहले जानकारी दिए ।

पुस्तकालयहरूको उद्घाटनका लागि सुर्खेतमा वरिष्ठ साहित्यकार सनत रेग्मी, वरिष्ठ उपन्यासकार एवम् कथाकार नयनराज पाण्डे, कवि नवराज पराजुली आउने छन् भने दैलेखमा निबन्धकार शेखर खरेल र उपन्यासकार तथा कथाकार कुमार नगरकोटी आउने छन्।

यस्तै, सल्यानमा उपन्यासकार उमा सुवेदी र रामलाल जोशी, रुकुम (पश्चिम)मा कथाकार राजेन्द्र पराजुली र निबन्धकार कुमारी लामा, जाजरकोटमा उपन्यासकार अर्चना थापा र सुविन भट्टराई, कालीकोटमा उपन्यासकार युग पाठक, जुम्लामा उपन्यासकार सिवानीसिंह थारु र डोल्पामा उपन्यासकार तथा कथाकार अमर न्यौपाने पुग्ने छन्।

जिल्लामा पुग्ने लेखकहरू र कैदीबीच पुस्तकका विषयमा अन्तर्क्रिया पनि हुने अभियान मूल आयोजक समितिले जनाएको छ ।

‘बुक क्लब’ गठन

‘कारागारलाई किताब’ अभियानअन्तर्गत पुस्तकालय स्थापना गरिएका कारागारहरूमा ‘बुक क्लब’ गठन गरिएको छ।

कैदीहरूमध्येबाट केही कैदीहरूको नेतृत्वमा क्लब गठन गरिएको मूल समितिले जनाएको छ। क्लबको नेतृत्वकर्ता तथा सदस्यहरूले आफ्ना साथीहरूलाई पुस्तक पढ्न अभिप्रेरित गर्ने छन्।उनीहरूले आफूले पढेका किताबको बारेमा अरु कैदीहरूबीच समीक्षा गर्दै पठन विकासमा सहयोग गर्ने छन् ।

यस्तै क्लबको तर्फबाट प्रत्येक शनिबार अन्तर्क्रिया कार्यक्रमको आयोजना गर्ने छ। कार्यक्रममा कैदीहरूबीच आ–आफूले पढेका पुस्तकहरूको समीक्षा गरिने कारागारलाई किताब अभियान मूल समितिका संयोजक तथा प्रदेश प्रहरी कार्यालयका प्रमुख डिआइजी शाहले जानकारी दिए।

उनका अनुसार धेरै किताब पढ्ने कैदीलाई पुरस्कारको समेत व्यवस्था गरिएको छ । पुरस्कारस्वरूप पुस्तक नै प्रदान गरिने उनले बताए ।