अहिले विषादी छ्याप्छ्याप्ती प्रयोग भइरहेको बेलामा यो निर्णय कार्यान्वयन गर्न अवश्य पनि कठिन र चुनौतीपूर्ण छ । तर, एउटा सकारात्मक कुरा के हो भने हाम्रो प्रदेश अन्य प्रदेशको तुलनामा अर्गानिक वस्तुहरू अलि बढी उत्पादन हुनेमा पर्दछ । दोस्रो कुरा, हामीले जे विषादी प्रयोग गरी उत्पादन गर्छौं । त्यसले स्वास्थ्यमा कति असर पार्छ भन्ने कुरा थाहा पाउनुपर्छ । सबै नागरिकलाई यस विरुद्ध सचेतना फैलाउनुपर्छ । एउटा ठूलो अर्थपूर्ण, पहिलो र चुनौतीपूर्ण काम गर्नलाई आधार तय गर्ने निर्णय गरेका छौं । मैले सचिवलाई यससम्बन्धी कार्यक्रम बनाउन निर्देशन दिइसकेको छु । प्रभावकारी कार्यक्रम बनाएर प्राविधिक रूपकै अघि बढ्न सकिन्छ । जस्तो सिक्किम पूरै अर्गानिक हो । त्यसबाट शिक्षा लिएर दीर्घकालीन आधार तय गर्न सक्छौं । यसलाई पूरै कार्यान्वयनमा ल्याउन समय लाग्ला । तर, हामीले एक, दुई, तीन गरेर आधार तय गर्दै विषादीमुक्त प्रदेश बनाएर छाड्छौं । विषादीलाई कसरी निरुत्साहित गर्ने भन्नेबारे छलफल चलाउँछौं । अस्तिको क्याबिनेट बैठकमा यसबारे छलफल चलायौं । विषादी पहिचान गर्ने उपाय खोज्दै छौं । विषादीले कुपोषण निम्त्याएको छ । यसका लागि पनि जनचेतनामूलक अभियानको खाँचो छ । सरकारी तवरबाटै विषादी प्रयोग गरिएका तरकारीलाई निरुत्साहित गर्ने नीति ल्याउँछौं । हामीले उत्पादन गरेका त्यस्ता अर्गानिक वस्तुहरूलाई बजारीकरण गर्न सहकारी र स्थानीय सरकारलाई आवश्यक सहयोग गर्छौं । म कृषिमन्त्रीको हैसियतले के भन्न सक्छु भने सहकारी अथवा गाउँपालिका/नगरपालिकालाई अनुदानको व्यवस्था गरेर गाडी आफैं किनेर आफैं संकलन गरेर बेच्ने व्यवस्था मिलाउन सकिन्छ । अहिलेको समस्या स्थानीय उत्पादनको बजारीकरण पनि हो ।